MAITE KHUA MIDANGTE TAN AN LUANGCHHUAK CHHUNZAWM
Maite Khua chu Covid-19 vanga harsatna thleng mekah midangte tan an penchhuak chhunzawm leh ta.
Ni. 16/4/2020 hian Maite Khawtlang mipuiten chawhmeh chi hrang hrang lakhawmin, Aizawla Veng lian leh mihring tam zualna pakhat, Bethlehem Vengthlang mipuite hnena a thlawna sem turin thlai chi hrang hrang an pe.
Heng an thlai lakkhawmte hi Pu Lalrampara Ralte, Maite pick up hmangin Bethlehem Vengthlang Local Task Force hruaitute hnenah hian a thlen a ni.
Ni. 8/4/2020 Nilaini khan Pu Lalrohlua te chhung, Maite Khua chuan, Betlehem Vengthlang Local Task Force hruaitute hnenah Lockdown vanga an veng chhunga Gas nghei mi harsate hnena sem turin *MEIHAWL* bag 40 a thlawnin an lo pe tawh bawk a ni.
Rual U zawkte sawi danin, Khaw taima tia hriat hlawh Maite Khua hian Kum 1957 Mautam ṭam lai khan Khaw ṭhenawmte tan buh leh thlai chi tam tham tak a lo pechhuak tawh a. Khaw tam tak purchawkna hmun a ni bawk. Kum 2007 mautam ṭampui lo thlen ṭum pawh khan Mizoram Sawrkar, Agriculture Deptt. ah Buh chi ṭhahnem tak a lo pe tawh bawk a ni.
Maite khua hi Saitual District chhunga awm niin, Aizawl aṭanga chhim chhak lam Mizoram laili taka awm a ni a. Ṭawi Wildlife Sanctuary bulṭhut khawchhak lam a awm a ni. Ramngaw nei ṭha tak khua a nih avangin sik leh sa thuah pawh hmun nuam tak a ni a. Thingsulthliah Rural Development Block huam chhung ami a ni a, Power & Eclectricity lamah Serchhip, Bukpui Transmission aṭanga power supply pek a ni bawk.
Maite Khua hian an khaw ram chhunga Ṭawitlang ramngaw aṭangin Tui hnianghnar taka lak tur an nei reng a, ṭhal-va-ek-char ah pawh tui hna kang ngai lo an nei a. Rambuai hma aṭang daih tawh khan Ṭawitlang ngaw tui hi Mau hmangin Maite Khua(3kms vela hla) ah an lo la lut tawh a ni. Maite ram aṭang hian an khaw ṭhenawm Chhawrtui Khua leh Saitual Town area te paw'n Zo-tui thianghlim tak an chawlut bawk a ni.
Aizawl aṭangin Km 103 a hla a ni a. Aizawl – Seling - Keifang thleng Champhai Road; National Highway No. 54-ah kalin Keifang kawn-ah Chhimlam hawi zawnga pengin Rulchawm - Ruallung - Mualpheng - Tawizo Khua kal tlangin Maite khua hi Truck Road black topping hna thawh mekin a pawh a ni.
Kum 2011-ah hian Maite khuaah mihring 1043 awmin chhungkua 187, In ding zawng zawng zat chu 213 a ni. Zirna lamah Anganwadi Centre - 2, Elimentary English Medium (Presbyterian English School) -1, Primary School - 1, Middle School - 1, High School – 1 a awm. Sakhuana lamah Kohhran hrang hrang Pathian Biak In nei hrang; Presbyterian, Isua Krista Kohhran,UPC (NEI), UPC (Mizoram) leh Mimal ina inkhawmna hun hmang ṭhin Mizo Israel Thar, Roman Catholic, Seventh Day Adventist te an awm a ni. Hriselna lamah Health Sub-Centre pakhat neih a ni a, Public Water point (Tuilak) 20-ah a awm. Public playground pakhat, Community Hall pakhat, VC Hause pakhat, YMA Information Centre (YMA Rûn), YMA Public Library leh MHIP CRECHE centre pakhat a awm bawk.
_Hausak hun nghaka midang ṭanpui tum mai lovin, kan tun dinhmun zel ah hian eng kawng emaw talin midang tan kan ṭangkai thei tih i hre thar zel ang u. Thil ṭha tih nana hun remchang ber chu "Tun hun" hi a ni si a._
Lalengzuala Pautu
Secretary
Maite Khawchhuak Welfare Association
Aizawl; Mizoram
Comments
Post a Comment